खाद्य परीक्षण गरिँदै, मिसावट गर्ने पसललाई कडा कारबाही गरिने

बैतडी । बजार अनुगमनका क्रममा बैतडीमा सङ्कलन गरिएका खाद्यका २७ नमूना परीक्षण गरिदै छ । मिसावट देखिएका खाद्य पसललाई खाद्य ऐन बमोजिम कडा कारवाही हुने खाद्य प्रविधि तथा गुण नियन्त्रण डिभिजन कार्यालयका प्रमुख कृष्णदत्त लेखकले बताए ।

बैतडीमा गरिएको बजार अनुगमनका क्रममा २७ ओटा नमूना सङ्कलन गरिएका थिए । ती खाद्य वस्तुका नमूनाको प्रयोगशालामा गुणस्तर परीक्षण गरिने र गुणस्तरीय नपाइए कारवाही गरिने छ । असोजभन्दा पहिले सङ्कलन गरिएका १५ नमूनामध्ये चार ओटा तोकिएको मापदण्डानुसार नपाइएकोले कारवाही प्रक्रिया थालिएको उनको भनाई छ ।

दुई व्यवसायीमाथि जिल्ला प्रशासन कार्यालय बैतडीमा मुद्दा दायर गरिएको छ भने अन्य दुई अनुसन्धानको क्रममा रहेका छन् । यसैबीच असोज पहिलो साताबाट गरिएको बजार अनुगमनका क्रममा रु सात लाख ७० हजारको म्याद नाघेका सामग्री बरामद गरी नष्ट गरिएको थियो । प्रत्येक पसलमा मूल्यसूची राख्न अनिबार्य गरिएको छ भने अनुगमनलाई निरन्तरता दिईएको छ।