- १९ असार २०८३, शुक्रबार / Jul 3, 2026
रुपन्देही । संघ तथा प्रदेशको निर्वाचनमा गठबन्धन कायमै राख्ने सत्तारुढ पाँच दलबीच लिखित सहमति भएसँगै लुम्बिनीका २६ संघीय निर्वाचन क्षेत्र र ५२ प्रदेश निर्वाचन क्षेत्रमा आ–आफ्नो दाबीको रसाकस्सी सुरू भएको छ ।
सबै दलबाट रहेका क्षेत्रभन्दा झण्डै दोब्बरको संख्यामा दाबी परेको छ । नेपाली कांग्रेस, माओवादीले अहिले स्थानीय तहमा आएको मतभारलाई पहिलो आधार बनाउनुपर्ने बताउँदै आएका छन् ।
संघीय तथा प्रदेशमा रहेको संख्या र गठबन्धनमा सबै दलको अस्तित्व रहनेगरी भागबण्डा हुनुपर्ने जसपा, नेकपा एस र राष्ट्रिय जनमोर्चाको भनाइ छ । कांग्रेसले लुम्बिनीबाट संघमा १६ र प्रदेशमा २८ सीट दाबी गरेको छ ।
माओवादी केन्द्रले संघमा १२ र प्रदेशमा २२ सीटमा दाबी गरेको छ । नेकपा एसले प्रतिनिधिसभामा ५ तथा प्रदेशमा २४ सीटमा दाबी गरेको छ ।
कांग्रेस, माओवादी र नेकपाले भएका सीटभन्दा धेरै संख्यामा दाबी गरेपनि गठबन्धनका साझेदार जसपा, राष्ट्रिय जनमोर्चाले सीट संख्या नबोली सम्मानजनक हैसियत खोजेको छ ।
