- ३ भाद्र २०८३, बुधबार / Aug 19, 2026
काभ्रे । सिन्धुलीबाट काठमाडौं आउँदै गरेको टाटासुमो काठमाडौंबाट भारततर्फ तीर्थयात्री लिएर जाँदै गरेको फोर्स गाडी एक–आपसमा जुद्धा पाँच जनाको निधन भएको छ ।
अत्यधिक गतिमा भएकाले अनियन्त्रित फोर्स गाडी ठोक्किएको प्रहरीले जनाको छ । फोर्स गाडीमा ठक्कर दिँदा सुमोमा सवार यात्रुहरुको निधन भएको छ भने पाँच यात्रुमध्ये चालक र आमाछोरासमेत रहेको प्रहरी प्रवक्ता डीएसपी हरि खतिवडाले बताए ।
उनले भने, ‘ठक्करका कारण सुमो क्षतविक्षत भएको छ । फोर्स गाडीमा पनि क्षति पुगेको छ । फोर्स गाडीका सञ्चालक प्रहरीको सम्पर्कमा आएका छैनन् ।’
ना १ ज ४२१० नम्बरको सुमोमा चढेका सिन्धुलीको कमलामाई नगरपालिका–६ रामपुरका ३० वर्षका विक्रम श्रेष्ठ, खाँडादेवी गाउँपालिका–३ रामेछापकी सम्झना भुसाल, उनका ६ वर्षीय छोरा संगीत भुसाल, सुनकोसी गाउँपालिका–१ सिन्धुलीका ४४ वर्षीया प्रमिला नेपाली,
सुमोका चालक कमलामाई नगरपालिका–४ सिन्धुलीका हरिबहादुर बल रहेका छन् । दुर्घटनामा घाइते भएका १९ जनाको धुलिखेल अस्पतालमा उपचार भइरहेको र ३ जनाको अवस्था गम्भीर रहेको प्रहरीले बताएको छ ।
भारतीय नम्बर प्लेटको यात्रुवाहक यूपी ५८ टी ८१८१ नम्बरको फोर्स गाडी सुमोसँग जुधेको थियो । बीपी राजमार्गको रोसी गाउँपालिका वडा नम्बर ११ मा उक्त दुर्घटना भएको हो ।
बीपी राजमार्गमा सुमो, हायस तथा हलुका सवारीसाधनको अत्यधिक गतिका कारण दुर्घटना बढेको प्रहरीले बताएको छ । सुमो चालकको निधन भएकाले दुर्घटनाको अन्य कारण पत्ता लाग्न नसकेको प्रहरीको भनाइ छ ।
