- २७ श्रावण २०८३, बुधबार / Aug 12, 2026
गुल्मी । शुक्रवारदेखि गुल्मीको रेसुङ्गा विमानस्थलबाट व्यावसायिक उडान सुरु भएको छ । शुक्रबार बिहानदेखि नेपाल वायुसेवा निगमको डीएचसी–६ ट्वीनअटर जहाजले व्यावसायिक उडान सुरु गरेको हो । नियमित उडान भरेर पहिलो पटक रेसुङ्गा विमानस्थल आइपुगेका यात्रुहरुलाई रेसुङ्गा नगरपालिकाका मेयर खिलध्वज पन्थीले स्वागत गरेका थिए ।
बिहान साढे ६ बजे काठमाण्डौ त्रिभुवन अन्तर्राष्ट्रिय विमानस्थलबाट उडेको निगमको डीएचसी–६ ट्वीनअटर जहाज बिहान साढे सात बजे रेसुङ्गा विमानस्थलमा सफल अवतरण गरेको हो । रेसुङ्गा विमानस्थलमा यसअघि तीन पटकसम्म परीक्षण उडान गरिएको थियो । विमानस्थल निर्माणको काम १७ वर्षमा सम्पन्न भएको हो ।
कुल ३५ करोड रुपैयाँ लागतमा सम्पन्न भएको विमानस्थल एक सय ५६ रोपनी क्षेत्रफलमा फैलिएको छ । उडान सुरु भएपछि गुल्मीका नागरिक खुसी भएका छन् ।
शुक्रबारबाट सुरु भएको नियमित उडानपछि जहाज चढ्ने वर्षौँदेखिको गुल्मेलीको सपना पूरा भएको छ । यात्रुहरुको सङ्ख्याको आधारमा उडानलाई हप्तामा दुई पटकसम्म सञ्चालन गरिने जनाएको छ । अहिले प्रति यात्रु छ हजार पाँच सय रुपैयाँ भाडा दर तय गरिएको छ ।
