घटेन भिडभाड, थप कडाई गर्नु जरुरी

काठमाण्डौ । काठमाण्डौ उपत्यकामा सार्वजनिक र निजी गाडीमा भिडभाड हटेको छैन् । उपत्यकामा जोरबिजोर प्रणाली लागू भएको एक हप्ता वितेपनि भिडभाड हटेको छैन् । सरकारको निर्णय अव्यावहारिक भएको भन्दै यात्रु र यातायात व्यवसायीले आलोचना गर्दै आएका छन् भने जोरबिजोर लागू भएपछि दैनिक गुड्ने गाडीको सङ्ख्या आधाले घटेको छ । कोरोनाको कहरमा चलेका गाडीमा भिडभाड बढेको छ ।

गृह मन्त्रालयले जोरबिजोर प्रणाली लागू गर्दा भिडभाड बढेको नागरिकको गुनासो आउन थालेको जनाएको छ । केही दिनमा निर्णय परिमार्जन हुनसक्ने गृहमन्त्रालयले जनाएको छ । अन्य क्षेत्रलाई खुला गरेर यातायातमा मात्रै कडाइ गर्दा भिड भएको गुनासो आइरहेको गृहमन्त्रालयको भनाई छ । जोरबिजोर प्रणाली हटाउनबारे काठमाण्डौ, भक्तपुर र ललितपुरका प्रमुख जिल्ला अधिकारी तयार देखिए पनि गृह मन्त्रालयले निर्णय गरिसकेको छैन ।