- ८ आश्विन २०८३, बिहीबार / Sep 24, 2026
काठमाडौं । तीन दिने चीनको भ्रमणमा परराष्ट्रमन्त्री डा. नारायण खड्का जाँदैछन् । चिनियाँ विदेशमन्त्री वाङ यिको निम्तोमा उनी चीन जान लागेका हुन् ।
साउन २४ देखि २६ गते सम्म चीनको भ्रमण गर्ने परराष्ट्र मन्त्रालयले जनाएको छ । साउन २५ गते दुई देशबीच विदेश मन्त्रीस्तरीय द्विपक्षीय भेटवार्ता हुने भएको छ । द्विपक्षीय हितका विषयमा छलफल हुने मन्त्रालयकी प्रवक्ता सेवा लम्सालले बताइन् ।
यो नेपालको तर्फबाट चीनमा हुन लागेको पहिलो उच्चस्तरीय भ्रमण हो । अमेरिकी परियोजना एमसीसीलगायतका योजनाहरू अगाडि बढ्दा चीनको बीआरआई परियोजना अलमलकै अवस्थामा छ ।
काठमाडौंबाट नुवाकोटको त्रिशूली हुँदै केरुङसम्मको भौगर्भिक अध्ययन, भूगोलको बनावट, रेखांकनको अवस्थासहितको सम्भाव्यता अध्ययन भइसकेको छ । अहिले सो रेलमार्गमा सुरुङलाई विशेष प्राथमिकता दिन लागिएको छ ।
मन्त्री खड्काको चीन भ्रमणका क्रममा बीआरआई अन्तर्गतका परियोजना अगाडि बढाउने विषयमा पनि छलफल हुने प्रवक्ता लम्सालले बताइन् । नेपाल र चीनबीच बीआरआईअन्तर्गत साझेदारी अगाडि बढाउन २०१७ मा समझदारी पत्रमा हस्ताक्षर भएको थियो ।
