- २२ असार २०८३, सोमबार / Jul 6, 2026
तनहुँ । तनहुँ क्षेत्र नम्बर १ मा राष्ट्रिय स्वतन्त्र पार्टीका उम्मेदवार डा. स्वर्णिम वाग्ले भारी मतले विजयी भएका छन् । प्रतिनिधिसभा सदस्य उपनिर्वाचनमा उनका निकटतम् प्रतिस्पर्धी नेपाली कांग्रेसका उम्मेदवार गोविन्द भट्टराई भन्दा १४ हजार ७ सयभन्दा बढी मत ल्याएर विजयी भएका हुन् ।
वाग्लेले ३४ हजार ९ सय १८ पाउँदा भट्टराईले २० हजार १ सय २२ मत पाएका छन् । वाग्लेले भट्टराईभन्दा १४ हजार ७ सय ९६ मत बढी ल्याएका छन् । एमाले उम्मेदवार सर्वेन्द्र खनाल ८ हजार ४ सय ८८ मतमा खुम्चिदै तेस्रो भए ।
राप्रपाकी शोभा गुरुङले २ सय १८ र मंगोल नेशनल अर्गनाइजेसनका प्रेमबहादुर थापाले १ सय ६६ मत पाएका छन् । वैशाख १० गते भएको उपनिर्वाचनमा तनहुँ क्षेत्र नम्बर १ मा ६५ हजार ३ सय १६ मत खसेकोमा ६४ हजार १ सय ३५ मत सदर भएको थियो ।
१ लाख २३ हजार ३ सय ५ मतदाता थिए । तनहुँ क्षेत्र नम्बर १ बाट विजयी नेपाली कांग्रेसका उम्मेदवार रामचन्द्र पौडेल राष्ट्रपति बनेपछि यहाँ रिक्त सांसद पदपूर्तिका लागि उपनिर्वाचन भएको थियो ।
