दैलेख र सप्तरीमा दुर्घटना हुँदा २ जनाको मृत्यु

दैलेख । यात्रुबाहक बस दैलेखमा दुर्घटना हुँदा एक जनाको ज्यान गएको छ । दुर्घटनामा नौ जना घाइते भएका छन् । सुर्खेतबाट जुम्लातर्फ जाँदै गरेको ना ६ ख ९२२ नम्बरको यात्रुवाहक बस दैलेखको दुल्लु नगरपालिका १ मा पर्ने दरबारे भीर नजिक दुर्घटना हुँदा अछाम पञ्चदेवल नगरपालिका–९ का ७४ वर्षीय भक्तबहादुर शाहीको ज्यान गएको हो ।

ब्रेक फेल भएर बस सडकको भित्तामा ठोक्किएको जिल्ला प्रहरी कार्यालय दैलेखले जनाएको छ । दुर्घटनामा घाइते भएका ९ जनालाई स्थानीय मेडिकलमा उपचार गराएको प्रहरीले जनाएको छ । त्यसै गरी सप्तरीको खडक नगरपालिका–६ इन्द्रचौतारी चोकमा बसले मोटरसाइकललाई ठक्कर दिँदा एक महिलाको ज्यान गएको छ ।

पूर्व– पश्चिम राजमार्ग अन्तर्गत इन्द्रचौतारी चोकमा प्रदेश २–०१–००१ प ०३३४ नम्बरको मोटरसाइकललाई बा ३ ख ९६९० नम्बरको बसले ठक्कर दिएको हो । बसको ठक्करबाट मोटरसाइकलको पछाडि रहेकी खडक नगरपालिका–९ सर्पाकी ३० वर्षीया गुल्लु खातुको ज्यान गएको हो । दुर्घटनामा घाइते भएकी खातुनको उपचारका लागि अस्पताल लैजाने क्रममा बाटैमा ज्यान गएको जिल्ला प्रहरी कार्यालय सप्तरीले जनाएको छ ।