- ६ आश्विन २०८३, मंगलवार / Sep 22, 2026
काठमाडौं । नवनियुक्त तीन जना मन्त्रीले राष्ट्रपति रामचन्द्र पौडेलसमक्ष शपथ लिएका छन् ।
बिहीबार राष्ट्रपति कार्यालयमा आयोजित विशेष समारोहमा कानुन, न्याय तथा संसदीय मामिलामन्त्री धनराज गुरुङ, स्वास्थ्य तथा जनसङ्ख्या मन्त्री मोहनबहादुर बस्नेत र युवा तथा खेलकुद मन्त्री डिगबहादुर लिम्बुले पद तथा गोपनीयताको शपथ लिएका हुन ।
नेपालको संविधानको धारा ८० बमोजिम राष्ट्रपति पौडेलसमक्ष पद तथा गोपनीयताको शपथ लिएको राष्ट्रपति कार्यालयका प्रवक्ता सागर आचार्यले बताए । प्रधानमन्त्री पुष्पकमल दाहाल ‘प्रचण्ड’को सिफारिसमा बुधबार राष्ट्रपति पौडेलले मन्त्री पदमा नियुक्त गरेका हुन ।
कांग्रेसका तर्फबाट मन्त्री बनेका धनराज गुरुङ उपसभापतिसमेत हुन । स्वास्थ्य तथा जनसङ्ख्या मन्त्री मोहन बस्नेत केन्द्रीय सदस्य हुन।
शपथ समारोहमा उपराष्ट्रपति रामसहायप्रसाद यादव, प्रधानमन्त्री प्रचण्ड, सभामुख देवराज घिमिरे, कायममुकायम प्रधानन्यायाधीश हरिकृष्ण कार्की, मन्त्रीहरू, संवैधानिक निकायका प्रमुख, सुरक्षा निकायका प्रमुख, उच्च सरकारी कर्मचारीको सहभागिता रहेको थियो।
