- ३१ भाद्र २०८३, बुधबार / Sep 16, 2026
काठमाडौं। भारतबाट मुर्रा राँगा पछि गाई, बाख्रा, बंगुर लगायत राम्रो जातका पशुचौपाया नश्ल सुधारका लागि ल्याइएका छन् । करिब एक सय १६ वटा पशुचौपाया नश्ल सुधारका लागि आयात गरिएको पशु सेवा विभागको तथ्याङ्कमा छ ।
कोरियाबाट गत एक सय २ वटा उन्नत जातका गाई र आठ वटा साँढे, अमेरिकाबाट ६ वटा उन्नत जातका राँगा, बोयर जातका बाख्रा चार सयको हाराहारीमा ल्याइएको सूचना अधिकारी डा. चन्द्र ढकालले बताए ।
अमेरिका, अस्ट्रेलिया, दक्षिण कोरिया लगायत विभिन्न मुलुकबाट नश्ल सुधारका लागि पशु चौपायाहरु ल्याइएको उनको भनाइ छ । भारत सरकारले सहयोगस्वरुप दिने १५ मुर्रा जातको राँगा भित्र्याउने प्रक्रिया अझै पुरा भएको छैन ।
ती राँगाको परीक्षणसकेको ढकालले बताए । विसं. १९१७ मा जंगबहादुर राणाले बेलायतबाट जर्सी गाईहरु ल्याएर नेपालमा नश्ल सुधारको थालनी भएको मानिन्छ । त्यसपछि विदेशबाट गाई, बाख्रा, कुखुरा, बंगुर लगायतका पशुको नश्ल सुधार गरिँदै आएको छ ।
दुधको उत्पादन र उत्पादकत्व बढाउनका लागि नश्ल सुधार गरिदै आएको राष्ट्रिय पशुपन्छी स्रोत व्यवस्थापन तथा प्रवर्द्धन कार्यालयका पशुविकास अधिकृत डा. धर्मराज गिरीले बताए । नश्ल सुधार हुँदै जाँदा दुईदेखि तीन गुणसम्म दुधको उत्पादन बढ्ने उनको भनाइ छ ।
नश्ल सुधारका लागि ल्याएका पशुको बीर्यबाट कृत्रिम गर्भाधान प्रक्रिया मार्फत उन्नत जातको पशुचौपायाको विकास गरिदै आएको गिरीले बताए । दुध दिने पशुचौपायाको संख्या बढेसँगै दुध उत्पादनमा पनि केही सुधार भएको मन्त्रालयको तथ्याङ्क छ ।
