- १४ असार २०८३, आईतवार / Jun 28, 2026
काठमाडौं । नारायणहिटी दरबार परिसरमा रेस्टुरेन्ट चलाउने निर्णय रोकेर राम्रो काम गरेको भन्दैप्रधानमन्त्री शेरबहादुर देउवाले पर्यटनमन्त्री प्रेम आलेलाई बधाई दिएका छन् ।
नारायणहिटी दरबार संग्रहालयभित्र रेस्टुरेन्ट सञ्चालन गर्न दिने पूर्ववर्ती सरकारको निर्णय कार्यान्वयनमा आलेले रोक लगाएपछि देउवाले आलेको प्रशंसा समेत गरेका छन् ।
केपी ओली नेतृत्वको सरकारले संग्रहालयभित्र बतास अर्गनाइजेसनको बिपिएस लिजिङ एन्ड अर्गनाइजेसनलाई रेस्टुरेन्ट चलाउन दिने निर्णय गरेको थियो ।
दरबार संग्रहालयलाई व्यापारमा लगाउन लागिएको भन्दै चौतर्फी विरोध भएपछि सोमबार पर्यटनमन्त्री आलेले त्यससम्बन्धी निर्णय कार्यान्वयन गर्न रोक्न लगाएका थिए ।
ओली सरकारले नारायणहिटीभित्र क्याफ्टेरिया चलाउन दिने प्रक्रिया सेटिङका आधारमा गरेको पर्यटन मन्त्रालयले बताएको छ ।
बतास अर्गनाइजेसनअन्तर्गतका बिपिएस लिजिङ तथा म्यानेजमेन्ट प्रालि, होटेल आनन्द प्रालि र बतास एसोसिएट्स मात्र प्राविधिक रूपमा टेन्डरमा योग्य हुने गरी टेन्डरसम्बन्धी कागजपत्र बनाइएको स्रोतको दावी छ ।
तीन कम्पनीमध्ये धेरै भाडा कबोल गर्ने बिपिएसले गत वर्ष पुसमा ठेक्का पाएको थियो । भारतले बनाइदिएको पशुपतिको धर्मशाला पनि होटेल चलाउन बतासलाई लिजमा दिइएको थियो ।
व्यापारिक घराना बतास अर्गनाइजेसनले पहुँचका आधारमा विभिन्न सरकारी सम्पत्ति लिजमा लिएर व्यापार गर्दै आएको छ ।
