- ११ कार्तिक २०८३, बुधबार / Oct 28, 2026
धनगडी । नेपाली कांग्रेस कैलालीको जिल्ला अधिवेशन माघ १६ गतेको मिति तय भएसँगै चुनावी चहलपहल ह्वातै बढेको छ। अधिवेशन नभएका १६ जिल्लामा आगामी माघ १६ गतेको मिति तय गरेसँगै सेलाएको कैलालीको चुनावी माहोल एकाएक बढेको हो ।
कांग्रेस केन्द्रीय कार्यालयले मिति तय गरेपछि बाँकी जिल्लाका अधिवेशन पुन हुन थालेका छन् । जिल्ला सभापतिका लागि संस्थापन पक्ष निकट जिल्ला उपसभापति प्रकाशबहादुर बम, पूर्व उपसभापति नारायणदत्त भट्ट, भीम बडुवाल, गणेश देउवा, खेमराज चौधरी र नवराज रावलले दावी गरेका छन् ।
संस्थापन बाहेकको पक्षबाट अहिलेसम्म सभापतिमा को उम्मेदवार हुने भन्ने खुलेको छैन । सभापतिका आकांक्षीहरूले अहिले वडा तथा पालिका र क्षेत्र स्तरीय भेला र भेटघाट कार्यक्रममा आफ्नो सहभागिता तीव्र बनाइरहेका छन्।
उप सभापतिमा दुई पदका लागि अर्जुन देउवा, प्रकाश देउवा, लोकराज पाण्डे आगो, रामप्रसाद चौधरी र तेजशंकर भट्टको चर्चा चलिरहेको छ ।
जिल्ला सचिवमा युवा नेता केशव मिश्र, अहिलेका कार्यसमिति सदस्य नृपबहादुर सुनार, अमृत बिसी, कृष्ण पाण्डे र थर्क शाहले आ–आफ्नो उम्मेदवारी दावी गरेका छन्।
एक सय २६ वडा रहेको कैलालीमा जिल्ला अधिवेशनका लागि २५ सय बढी प्रतिनिधिहरू रहेका छन्। १३ स्थानीय तह रहेको कैलालीमा ६ गाउँपालिका ६ नगरपालिका र एक उपमहानगरपालिका छन्।
गाउँपालिकाका एक पुरुष र एक महिला गरी १२ जना निर्वाचित हुनेछन् भने नगरपालिकामा एक महिला र दुई पुरुष गरी १८ जना निर्वाचित हुनेछन्। उपमहानगरपालिकाबाट दुई महिलासहित तीन पुरुष गरी पाँच जना निर्वाचित हुनेछन्।
