- २६ भाद्र २०८३, शुक्रबार / Sep 11, 2026
मोरङ । उर्लाबारी–४ थापाडाँगीकी दलित १२ वर्षीया बालिका फुलसरी मंग्रान्तीलाई पानी छोएको भन्दै निर्घात कुटपिट गरिएको छ । कुटपिटबाट बालिका घाइते भएकी छिन् ।
पीडित बालिकाले उजुरी दिदा प्रहरीले उजुरी लिन मानेको छैन । फुलसरीलाई नन्दलाल श्रेष्ठ, उनकी पत्नी निर्मला र छोरा अम्बिरले कुटपिट गरेको आफन्त दुर्गाकुमारी रोकाले बताइन् । आमाबुबा बेपत्ता भएकी फुलसरीलाई दुर्गाले नै आश्रय दिइरहेकी छिन् । श्रेष्ठले दलित बालिकाले पानी भन्दै सोमबार निर्घात कुटपिट गरेका थिए ।
कुटपिटबाट बालिकाको शरीरभरि नीलडाम छ । जातीय विभेद गरेर कुटपिट गरेको भन्दै दुर्गाले इलाका प्रहरी कार्यालय उर्लाबारीमा किटानी जाहेरी दिएकी छिन् । तर, प्रहरीले उजुरी दर्ता गरेको छैन । इलाका प्रहरी कार्यालयका इन्चार्ज इन्स्पेक्टर सुभाष राईले भने, ‘मैले एसपीसाबलाई रिपोर्टिङ गरेँ । माथिबाटै घटनास्थलमा गएर बुझेर मात्र जाहेरी दर्ता गर्न निर्देशन छ ।’
