- १६ भाद्र २०८३, मंगलवार / Sep 1, 2026
काभ्रे । निकै महत्वपूर्ण मानिएको फूलचोकीदेखि पनौतीसम्मको साहसिक साइकल ट्रेल सञ्चालनमा आएको छ । शनिबार पनौती नगरपालिका आयोजक र भिलेज हाइल्याण्ड रिसोर्ट सहआयोजक समेत रहेको ललितपुरको फूलचोकी डाँडादेखि काभ्रेको पनौती नगरपालिका–२ गुर्दुम डाँडासम्म निर्माण गरिएको साहसिक साइकल ट्रेल पनौती नगरपालिकाका उप–प्रमुख गिता बञ्जाराले उद्घाटनपछि सञ्चालनमा आएको हो ।
साइकल ट्रयाक सञ्चालनमा आएपछि यहाँको पर्यटन व्यवसायमा टेवा पुग्ने पनौती नगरपालिका वडा नं २ का वडा अध्यक्ष पुरुषोत्तम अधिकारीले बताए । उनले नेपालमा यस्तो साहसिक खेलले पर्यटन क्षेत्रलाई प्रवद्र्धन गर्न महत्वपूर्ण भूमिका खेल्ने जानकारी दिदै पनौती नगरपालिकाको पर्यटन समिति र पनौती नगरपालिका पर्यटन प्रर्वद्धन निरन्तर लागि परेको जानकारी दिए ।
उद्घाटन पछि कुसादेवीमा भएको समापन समारोहमा पनौती नगरपालिकाका मेयर भीम न्यौपानेले पनौती नगरपालिका पर्यटकीय क्षेत्रको विकासमा लागि परेको बताउदै यस्ता ठाउँ र संरचनाको संरक्षण गर्ने बताए ।
पनौती नगरपालिका वडा नं ३ का वडा अध्यक्ष किसोर थापाले साहसिक खेलले पर्यटन क्षेत्रमा पनौती नगरपालिकालाई अग्रस्थामा राख्ने बताए । उनले पनौतीको पहिचानमा साहसिक खेलहरु पनि थपिदै गएको बताए । कार्यक्रममा पर्यटन व्यवसायी तथा भिलेज हाइल्याण्ड रिसोर्टका सञ्चालक रामसुन्दर बकेले सरकारी र नीजि क्षेत्रको समन्वयविना विकास अघि बढ्न नसक्ने बताउदै फुल्चोकी देखि गर्दुम डाडासम्मको साहसिक साइकल ट्रेलले आफुलाई खुशी बनाएकाे बताए ।
उनले भने, ‘विकास भनेको यसरी नै हुने हो आतिनु हुदैन, निरन्तर लागेपछि हरेक कुरा सम्भव हुन्छ ।’ उद्घाटनपछि १ सय ७५ जनाले साइक्लिङ गरेका हुन । साइक्लिङ गर्न विभिन्न ठाउँबाट सहभागि भएका साहसी खेलाडीहरुले आफूले यस्तो ठाउँमा साइकल चलाउन पाउँदा खुशी लागेको बताए ।
साइक्लिङ गर्नेहरूलाई प्रमाणपत्रद्वारा सम्मान गरिएको थियो । उक्त साइकल मार्गको दुरी ७ किलोमिटर रहेको छ । यस्तै गुर्दुम डाँडाबाट ३ किलोमिटरको दुरीमा कुशादेवीस्थित ग्वार्को–पनौती–नमोवुद्ध सडकमा पुगिन्छ ।
