बँदेललाई थापेको पासोमा दाजुभाइको मृत्यु

बैतडी । बँदेलका लागि छाडिएको करेन्ट पासोमा परेर दुई जनाको मृत्यु भएको छ । सुर्नया गाउँपालिका–५ स्वालीका २१ वर्षीय सन्तोष चन्द र १८ वर्षीय अमृत चन्द दुई दाजुभाइको मृत्यु भएको प्रहरीले जनाएको छ ।

बुधबार राति पौने ११ बजे घर नजिकै रहेको मकैबारीमा जङ्गली बँदेलका लागि छाडिएको बिजुलीको तारबाट करेन्ट लागेर दुवैको घटनास्थलमै मृत्यु भएको बैतडीका प्रहरी निरीक्षक बोधराज ओझाले बताए ।

ओझाले भने, ‘जङ्गली बँदेल मार्नका लागि मकैबारीमा करेन्ट छाडिएको रहेछ, उनीहरु बँदेल धपाउन मकैबारी गएका बेला करेन्ट लागेको भन्ने बुझिएको छ ।’

घटनाको स्थलगत थप अनुसन्धान भइरहेको इलाका प्रहरी कार्यालय पाटनका इञ्चार्ज, प्रहरी निरीक्षक राजेश शाही बताए । जङ्गली जनावरले नष्ट गर्न थालेपछि बैतडीका अधिकांश किसानले मकैबाली जोगाउन यस्तो उपाय गर्दै आएका छन् ।