बेपत्ता भएकालाई मोतिले खोज्दै

सङ्खुवासभा । बाढीपहिरोमा परी बेपत्ता भएकाहरुको खोजीकार्यका लागि तालिम प्राप्त कुकुर परिचालन गरिएको छ । अविरल वर्षासँगै आएको बाढीपहिरोका कारण २० जना बेपत्ता भएका थिए । एक सातासम्म पनि फेला नपरेपछि तालिम प्राप्त कुकुर परिचालन गरी खोजी थालिएको छ ।

तालिम प्राप्त मोति र पिक्कु नाम गरेका कुकुर बेपत्ताको खोजीमा परिचालन गरिएका छन् । नेपाल प्रहरीले धरानबाट ल्याइएको तालिम प्राप्त दुई वटा कुकुरको सहायतामा आज बिहान सभाखोलादेखि खोजी थालिएको सङ्खुवासभाका प्रमुख जिल्ला अधिकारी शिवकुमार कार्कीले बताए ।

तालिम प्राप्त कुकुरले हेवाखोला र सभाखोला किनारमा बेपत्ताको खोजी गरिरहेको उनले बताए । मोति र पिक्कुसँगै प्रहरी, सेना र सशस्त्र प्रहरी गरी झण्डै एक सुरक्षाकर्मी परिचालन गरिएको छ । खोला किनारमा ६० फिटभन्दा बढी बालुवा थुप्रिएका कारण उद्धार टोलीलाई बालुवा हटाउन समस्या भएको छ ।