मंसिर २८ गते संसद्को हिउँदे अधिवेशन, एमालेको अवरोध कायमै रहने

काठमाडौं । संसद्को हिउँदे अधिवेशन मङ्सिर २८ गतेदेखि सुरु हुने भएको छ । अघिल्लो अधिवेशन विधायिकी प्रक्रिया अघि बढाउन संसद् असफल भएको थियो ।

सङ्घीय संसद्मा अहिले पनि ५७ विधेयक विचाराधीन अवस्थामा छन् । अघिल्लो अधिवेशनमा एउटा पनि कानुन तर्जुमा नगरी अधिवेशन अन्त्य गरिएको थियो भने प्रतिपक्षी एमालेको अवरोध कायमै थियो । एमालेकै कारण अवरुद्ध भएको अधिवेशन कात्तिक १२ गते अन्त्य गरिएको थियो ।

अहिले हुने आउँदो अधिवेशनमा पनि संसद अधिवेशन चल्न नदिने अडान एमालेले दोहो–याएको छ । कानुन तर्जुमाको अधिवेशनका रूपमा चिनिने हिउँदे अधिवेशनका लागि सङ्घीय संसद्मा ५७ विधेयक विचाराधीन रहेको सङ्घीय संसद्का सहायक प्रवक्ता दशरथ धमलाले बताए। प्रतिनिधि सभामा ४४ र राष्ट्रिय सभामा १३ विधेयक छन् ।

विधेयकमध्ये दर्ता तथा सदस्यहरूलाई वितरण मात्र भएका १५ विधेयक छन् । जसमा प्रतिनिधि सभामा १२ र राष्ट्रिय सभामा ३ वटा छन् ।