महको आम्दानीले शिक्षकको तलब

म्याग्दी । मह सिकारबाट भएको आम्दानीले स्थानीय रितुङ माध्यमिक विद्यालयमा निजी स्रोतका शिक्षकलाई तलब खुवाउने गरिएको छ । रघुगङ्गा गाउँपालिका–८ कुइनेमङ्गलेमा वडाभित्रका गाउँबस्तीका स्थानीयवासीले आलोपालो गरी मह काढ्ने र वडा कार्यालयको संयोजनमा टोली विभाजन गरी मह बिक्री गरी आएको आम्दानीबाट विद्यालय सञ्चालनमा सहयोग गर्न थालिएको हो ।

सङ्कलन भएको महको बिक्रीबाट मह काढ्न परिचालन भएकाहरुलाई पारिश्रमिक छुट्याएर बचत हुन आउने रकम विद्यालमा निजी स्रोतबाट राखिएका शिक्षकहरूको तलब जुटाउन परिचालन गर्ने गरिएको वडाध्यक्ष गमान छन्त्यालले बताए ।

मह सिकारमा भिरमा चढेर मह काढ्ने भिरौटेलाई प्रतिदिनको रु तीन हजार ५००, भिरको टुप्पोमा बसेर मह सङ्कलनमा सघाउनेलाई रु दुई हजार र अन्य सहयोगीलाई रु एक हजार १०० का दरले पारिश्रमिक उपलब्ध गराउने गरिएको छ ।