- १७ असार २०८३, बुधबार / Jul 1, 2026
काठमाडौं । माघीपर्वको अवसरमा स्थानीय तहले आ–आफ्नै तवरले बिदा दिएका छन् । कतिपयले दुई त केही पालिकाले तीन दिन बिदा दिने निर्णय गरेका छन् ।
यसैबीच कैलालीको भजनी नगरपालिका, जानकी गाउँपालिकाले दुई दिन अर्थात् १ र २ गते सार्वजनिक बिदा दिने निर्णय गरेका हुन् भने कैलारी र जोशीपुर गाउँपालिकाले तीन दिन बिदा दिने निर्णय गरेका छन् । सरकारले माघ १ गते सार्वजनिक बिदा दिएको निर्णय सार्वजनिक गरिसकेका बेला केही पालिकाले थप एक वा दुई दिन बिदा दिने निर्णय गरेका हुन् ।
भजनी नगरपालिका र जोशीपुर गाउँपालिकाले २ गतेसम्म बिदा दिएका छन् भने कैलारी र जोशीपुर गाउँपालिकाले तीन दिन बिदा दिएको छ । 
कैलारी गाउँपालिकाले पुस २९, माघ १ र २ गते गरी तीन दिन बिदा दिएको गाउँपालिका प्रमुख प्रशासकीय अधिकृत खगेन्द्रराज जोशीले बताए ।
त्यस्तैजोशीपुर गाउँपालिकाले भने १, २ र ४ गते बिदा दिएको गाउँपालिकाका अधयक्ष रामकृष्ण चौधरीले बताए । थारू बाहुल्यता भएका क्षेत्रमा थारू समुदायले माघीमा तीन दिन बिदा दिनुपर्ने माग गरेका थिए । थारू समुदायमा माघीको अवसरमा गाउँमा बडघर भल्मन्सा छनोट गर्ने, गाउँमा अर्को वर्ष गरिने कार्यको वार्षिक योजना बनाउने काम हुन्छ ।
यसका साथै समुदायका समस्याबारे छलफलसमेत हुने भएकाले यो पर्व महत्वपूर्ण रहेको छ । घर छुट्टिनेहरुको भागबण्डासमेत हुने चलन पनि यो पर्वसँग जोडिएको छ । धार्मिक, पारिवारिक र सामाजिक महत्व जोडिएकाले यो पर्वलाई थारुसमुदायले अझ विशेषरुपमा मनाउने गरेको छ ।
