- २८ श्रावण २०८३, बिहीबार / Aug 13, 2026
काठमाडौँ । बागमती प्रदेशका मुख्यमन्त्री डोरमणि पौडेलविरूद्धको अविश्वास प्रस्तावमा आज पनि छलफल नहुने भएको छ । बागमती प्रदेश सभाको बैठक स्थगित भएको छ ।
विशेष कारण भन्दै अर्को सूचना जारी नभएसम्मका लागि बैठक स्थगित भएको प्रदेशसभा सचिवालयका प्रमुख सचिव कृष्णहरि खड्काले बताए ।आजको बैठकमा पौडेलविरुद्ध दर्ता गरिएको अविश्वासको प्रस्तावमाथि छलफल हुने र केही विधेयकको प्रस्ताव पनि प्रस्तुत हुने कार्यसूची रहेको थियो ।
प्रदेशसभाको बैठक आजका लागि बोलाएको थियो । केपी शर्मा ओली निकट मुख्यमन्त्री पौडेलविरुद्ध प्रचण्ड–माधव पक्षका ४५ जना प्रदेशसभा सदस्यहरुले गत पुस १० गते अविश्वासको प्रस्ताव दर्ता गराएका थिए । अविश्वासको प्रस्ताव छल्न विना कारण बैठक स्थगित गरिएको भन्दै प्रचण्ड–माधव पक्षले नारावाजीसमेत गरेका थिए । पुस ५ मा प्रतिनिधिसभा विघटन गरिएसँगै विभाजित नेकपामा प्रचण्ड–माधव पक्षको बहुमत रहेको छ ।
