- २२ श्रावण २०८३, शुक्रबार / Aug 7, 2026
२७ असार २०७७ काठमाडौं । म्याग्दीको मराङ र मालिका गाउँपालिका–७ बिमको पहिरोमा परेका १२ जनाको शव फेला परेको छ । पहिरोमा मराङको कल्लेनीमा तीन, राम्चेमा १०, रिखमा सात, ठूलोगाउँमा एक र कुम्रीमा एक जना बेपत्ता भएका थिए । ठूलोगाउँका २ जनाको शव भेटिएको स्थानीयले बताएका छन् ।
प्रतिकूल मौसम र भौगोलिक विकटताका कारण सुरक्षाकर्मी पुग्न नसक्दा शुक्रबार बिहान पहिरो गएको ठाउँमा उद्धार र खोजीमा ढिलाइ भयो भने सडक र घोरेटोबाटो पहिरोले भत्काएकाले आज बिहानसम्म सुरक्षाकर्मी पठाइएको छ । चारैतिर पहिरोले घेरिएको कल्लेनीका ५० जनाभन्दा बढीलाई गाउँपालिकाको अगुवाइमा उद्धार गरेर धारापानी र ताकम लगिएको छ ।
घण्टीवाङका पहिरोपीडित १३ परिवार आरवाङको जनविकास आधारभूत विद्यालयको भवनमा आएर बसेका छन् । प्रमुख जिल्ला अधिकारी ज्ञाननाथ ढकालले स्थलमार्गबाट जान सम्भव नभएपछि सेनाको हेलिकोप्टरबाट सुरक्षाकर्मीलाई पहिरो प्रभावित ठाउँमा पुर्याउने तयारी भएको बताए ।
तनहुँका ४३ घरपरिवारलाई सुरक्षित स्थानमा सारियो
अविरल वर्षात् कारण सेतीनदी किनार क्षेत्रमा बस्दै आएका तनहुँको शुक्लागण्डकी नगरपालिका क्षेत्रका ४३ घरपरिवारका करिब २०० बढी जनालाई सुरक्षित स्थानमा स्थानान्तरण गरिएको छ । सेतीमा पानीको बहाव एक्कासि बढेपछि ४३ घरपरिवारलाई सुरक्षित स्थानमा सारिएको हो । पानी परिरहेकाले उनीहरुलाई सुरक्षित स्थानमा लैजानसमेत कठिनाइ भएको छ ।
