राष्ट्रिय राजनीतिमा विप्लवको प्रवेश सामान्य होइनः खड्ग विश्वकर्मा

काठमाडौं । राष्ट्रिय राजनीतिमा पार्टीको शान्तिपूर्ण ढंगले प्रवेश सामान्य घटनाक्रम नभएको नेपाल कम्युनिस्ट पार्टीका प्रवक्ता खड्गबहादुर विश्वकर्माले बताएका छन् । राजधानीमा आयोजित पत्रकार सम्मेलनमा विश्वकर्मामाले सरकारसंग गरिएका सहमतिलाई कार्यान्वयन गर्ने सन्दर्भमा राज्यपक्षले ढिलाइ गरेको भन्दै असन्तुष्ट व्यक्त गरे ।

प्रधानमन्त्रीले राष्ट्रिय राजनीतिमा देखिएको उतारचढाव, कोरोना महामारीलगायतका कारण सहमति कार्यान्वयनमा ढिलाइ भएको र छिट्टै सहमति कार्यान्वयनतर्फ जाने प्रतिबद्धता जनाएको संचारकर्मीसंग बताए । हप्ता १० दिनभित्र माग सम्बोधन गर्न प्रधानमन्त्रीको ध्यानाकर्षण गराइएको र ती माग प्रति प्रधानमन्त्री सकारात्मक भएको बताए ।

उनले भने, ‘बन्दीलाई छिट्टै छाड्नुपर्ने हामीले भनेका छौं । यो राजनीति हो, परिवर्तन हो, आन्दोलन हो । सहमति कार्यान्वयन नभए सरकारले ठूलो मूल्य चुक्ता गर्नुपर्छ ।’
सरकारको तर्फबाट राजन भट्टराईलाई आफूहरुको माग पूरा गर्न प्रधानमन्त्रीले आवश्यक निर्देशन दिएको समेत विश्वकर्माले जानकारी दिए ।