शून्य समयमा सरकारको ध्यानाकर्षण

काठमाडौं । प्रतिनिधिसभाको आजको बैठकमा शून्य समय लिएर बोल्दै सांसदहरुले सरकारको ध्यानाकर्षण गराएका छन् । नेपालमा सुन्तला उत्पादनको सम्भावना देखि शुक्लाफाँटा वन्यजन्तु आरक्षपीडित र नागढुङ्गा सुरुङमार्ग निर्माणमा भइरहेको ढिलाइबारे सदनमार्फत सरकारको सांसदहरुले ध्यानाकर्षण गराएका हुन ।

साँसद ठाकुरप्रसाद गैरे, डा तोसिमा कार्की, दीपक खड्का, सांसद दीपा शर्मालगायतले खगेन्द्र नवजीवन केन्द्रको आर्थिक पारदर्शितामाथि प्रश्न उठाउँदै राष्ट्रिय गौरवका आयोजनामा बजेट अभावसम्मका कुराहरु उठाएका छन् ।

यस्तै सांसद दिलेन्द्रप्रसाद बडूले संसद्मा दुग्ध किसानले आफ्नो उत्पादनको मूल्य नपाएको र मिटरब्याज्पीडितले न्याय पाउन नसकेको विषय उठाए । सांसद देवप्रसाद तिमलसेनाले दुग्ध किसानले आफ्नो उत्पादनको मूल्य चाँडोभन्दा चाँडो पाउनु पर्नेमा सरकारको ध्यानाकर्षण गएका थिए ।

पशु चौपायामा लागेको लम्पीस्किन रोगको बीमाबापतको रकम भुक्तानी हुन नसकेको भन्दै सम्बन्धित विषयमा कृषि तथा पशुपंक्षी विकास मन्त्रीमन्त्रीले सदनमार्फत जवाफ दिनुपर्ने माग समेत साँसदले गरेका थिए ।

सांसद प्रदीप यादवले इन्टरनेट सेवा प्रदायक कम्पनीले टिकटक बन्द गर्ने सरकारको निर्णय नमानेको विषय संसद्मा जोडदार कुरा उठाए । सांसद बद्रीप्रसाद पाण्डेले वर्षान्तको खर्च र असारे विकास रोकिनुपर्ने बताए । सांसद बलराम अधिकारीले वाणगङ्गा सिँचाइ आयोजनालाई केन्द्र सरकार मातहत ल्याउन माग गरे ।