- ३१ जेष्ठ २०८३, आईतवार / Jun 14, 2026
चितवन । श्रीमानको कुटाइबाट गम्भीर घाइते भएकी गीता माझीको उपचारको क्रममा मृत्यु भएको छ । चितवन खैरहनीकी माझीको गएराति भरतपुर अस्पतालमा मृत्युु भएको प्रहरी कार्यालय चितवनका प्रहरी प्रवक्ता डीएसपी नरहरि अधिकारीले बताए ।
खैरहनी नगरपालिका वडा नम्बर १० कठारकी ३८ वर्षीया माझीलाई उनका श्रीमान रामचन्द्र माझीले गीताको मलद्वारबाट लौरो घुसाएर यातना दिएपछि गीता गम्भीर घाइते भएकी थिइन् ।गीताको मलद्वार र यौनाङ्ग बीचको भाग च्यातिएको उपचारमा संलग्न चिकित्सक बताउँछन् ।
पटक–पटक उनी कुटपिटबाट घाइते भएकी भनेर स्थानीयले बताएका छन् । बिहीबार घाइते उनको भरतपुर अस्पतालमा शल्यक्रिया गरिएको थियो । सोमबार राति ११ बजेतिर एक्कासी मुटुको धड्कन बन्द भएर उनको मृत्यु भएको अस्पतालका सूचना अधिकारी गोपाल पौडेलले बताए ।
गीताका श्रीमान रामचन्द्र अहिले प्रहरी हिरासतमा छन् । उनलाई ज्यान मार्ने उद्योग र जबरजस्ती करणीमा मुद्दा दर्ता गरिएको प्रहरीले बताएको छ ।
जाहेरी गर्ने मानिस नभएर प्रहरीले आफ्नै प्रतिवेदनमा आधारित भएर मुद्दा चलाएको जनाएको छ । रक्सी खाने पैसा नदिएको भनेर गीतालाई कुट्ने गरेको स्थानीयले बताएका छन् ।
