- २७ भाद्र २०८३, शनिबार / Sep 12, 2026
काठमाडौँ । कोभिड–१९ संक्रमित बिरामीको उपचारका लागि आवश्यक अक्सिजन निःशुल्क प्रदान गर्ने उद्देश्यले सानेपामा ‘अक्सिजन बैंक’ सुरु गरिएको छ । लाइन्स क्लब अफ काठमान्डु समर्पणले सुरु गरेको अक्सिजन बैंक साउन ३१ गतेदेखि लागु छ । करिब ३० लाख रुपैयाँ खर्चेर सानाठूला गरी २ सय वटा अक्सिजन सिलिन्डर खरिद गरी अक्सिजन बैंकको सुरुवात गरेको हो ।
होम आइसोलेसनमा बस्ने विपन्न वर्गका बिरामीहरूलाई लक्षित गरी बैंक स्थापना गरेको क्लबका अध्यक्ष दीपक बंशलले जानकारी दिए । गम्भीर बिरामी परेका संक्रमितलाई अस्पताल र सामान्य बिरामीलाई घरमा राखेर उपचार गर्न सके अस्पतालमा बिरामीको भीडभाड कम हुने उनीको भनाई छ ।
अक्सिजन बैंकको सेवा विशेषगरी असहाय तथा आर्थिक अवस्था कमजोर भएका कोभिड संक्रमितहरूका लागि भए पनि अत्यावश्यक भएमा अन्य व्यक्तिहरूलाई पनि उपलब्ध गराउने उनको भनाइ छ । अक्सिजन उपलब्ध गराउनुअघि आफूहरूले ती व्यक्तिहरूको सम्पूर्ण विवरण लिने गरेको ‘अक्सिजन बैंक’ का अध्यक्ष विवेक शर्माले बताए ।
अक्सिजनको आवश्यकता भएमा सम्बन्धित वडाध्यक्षको सिफारिस अनिवार्य लिनु पर्ने छ । त्यसपछि उक्त व्यक्तिलाई सिलिन्डर पठाउने गरेको उनले जानकारी दिए । वडाध्यक्षको सिफारिस ल्याउन नसकेको खण्डमा क्लबले ती व्यक्तिका बारेमा सबै बुझेर मात्र अक्सिजन दिने गरेको बताए ।
