- ६ कार्तिक २०८३, शुक्रबार / Oct 23, 2026
कैलाली । भजनी नगरपालिकाले एक वडा एक प्राविधिक खटाएको छ । वडास्तरबाट हुने विकास आयोजनालाई समयमै लागत अनुमान दिन र काम शुरु गर्न समस्या भइरहेकाले नगरपालिकाका नौ वटै वडामा एकएक प्राविधिक खटाइएको जनाएको छ ।
जुनसुकै योजनामा सम्बन्धित वडाबाटै स्थलगत अनुगमन गरी लागत अनुमान बनाउन सकिने तथा योजना सम्पन्न हुँदा पनि त्यहीँका प्राविधिकले स्थलगत अनुगमन गर्ने, कामको मूल्याङ्कन समयमै हुनेजस्ता योजनाका कामका लागि नगरपालिकाबाट प्राविधिकको टोलीले सबै काम गर्न सम्भव नभएपछि वडामै प्राविधिक रहने व्यवस्था गरिएको नगर उपप्रमुख छाया देवकोटाको भनाइ छ ।
‘गुणस्तरीय काम र स्टिमेट निर्माण गर्दा भौगोलिक अवस्था र विपत्को अवस्था हेरी प्रत्यक्ष निगरानी गर्न सकिनेछ । समयमा उपभोक्ता समिति गठन, काम सम्पन्न हुनेछ ।’ यसअघि प्रत्येक वडाका योजनाको लागत अनुमान र अनुगमन नगरपालिकाबाटै गर्दा उपभोक्ता समितिलाई समयमै योजनाको लागत अनुमान दिन र काम शुरु गर्न समस्या भइरहेकाले नगरपालिकाका निमित्त प्रमुख प्रशासकीय अधिकृत हरिराम चौधरीले स्थानीयवासीको सुविधाका लागि वडामै प्राविधिक राख्ने निर्णय गरिएको जानकारी दिए।
