- ३१ असार २०८३, बुधबार / Jul 15, 2026
धनगढी । सत्तारुढ दल नेकपा माओवादी केन्द्र र नेपाली काँग्रेसका नेताहरुलाई सहभागी सुदूरपश्चिमका मुख्यमन्त्री कमलबहादुर शाहले शनिबार मन्त्रिपरिषद विस्तार गरेका छन् ।
विस्तारित मन्त्रिपरिषदमा नेकपा माओवादी केन्द्रले दुई मन्त्रीसहित एक राज्य मन्त्रीको नाम सिफारिस गरेको थियो । माओवादी केन्द्रबाट रमेश धामी, झपट साउद र गीतादेवी माल मन्त्री बनेका छन् । साउद सामाजिक विकास मन्त्री, धामी उद्योग, पर्यटन, वन तथा वातावरण मन्त्री बनेका छन् भने गीतादेवी माल उद्योग, पर्यटन, वन तथा वातावरण राज्यमन्त्री बनेकी छन् ।
यस्तै शनिबार बसेको नेपाली काँग्रेस सुदुरपश्चिम संसदीय दलको बैठकले नेपाली कांग्रेसबाट बझाङका पृथ्वीबहादुर सिंहलाई मन्त्री बनाउँने निर्णय गरेको थियो । सिंहले आन्तरिक मामिला तथा कानुन मन्त्रालयको जिम्मेवारी पाएका छन् ।
त्यस्तै सत्तारुढ दल नागरिक उन्मुक्ति पार्टीले दुुई मन्त्रालय पाउँनु पर्ने अडान राखेर मन्त्रीको नाम सिफारिस नगरेपछि काँग्रेस र माओवादीको सहभागीतामा मन्त्रिपरिषद विस्तारित गरिएको हो । उक्त पार्टीका प्रवक्ता दामोदर पण्डितले आफूहरुलाई २ वटा मन्त्रालय दिने सहमति भएको तर अहिले मुख्यमन्त्रीले एउटा मात्र नाम मागेकाले सरकारमा सहभागी नभएको बताए । यद्यपि आफूहरु छलफलमै रहेको उनले बताए ।
यता मुख्यमन्त्री शाहले नागरिक उन्मुक्ति पार्टीका लागि भूमि व्यवस्था कृषि तथा सहकारी मन्त्रालय खाली राखेका छन् । मुख्यमन्त्री शाह २०७९ को माघ २६ गते मुख्यमन्त्री नियुक्त भएका थिए ।
