सुदूरपश्चिम प्रदेशसभाको बजेट अधिवेशन अन्त्य भएको ६ महिनापछि आज शुरु

काठमाडौं । सोमवारदेखि सुदूरपश्चिम प्रदेशसभाको सातौं अधिवेशन शुरु हुँदैछ । ६ महिनापछि प्रदेशसभाको हिउँदे अधिवेशन शुरु हुन लागेको हो । बैठकमा सरकारबाट तर्फबाट पेश भएका विभिन्न ३ वटा विधेयक टेबुल गर्ने कार्यसूची तय भएको जनाइएको छ।

गत पुस १४ गते मुख्यमन्त्री त्रिलोचन भट्टले भौतिक पूर्वाधार विकास मन्त्री पठानसिंह बोहरालाई बर्खास्त गरेका थिए। त्यसपछि आर्थिक मामिला तथा योजना मन्त्री झपट बोहराले राजीनामा दिएका थिए। आकांक्षी धेरै हुँदा मुख्यमन्त्रीले रिक्त मन्त्रालयमा मन्त्री नियुक्त गर्न सकेका छैनन्।

दाहाल–नेपाल र ओलीसमूह अनौपचारीक विभाजित भएपछि पहिलो पटक बस्न लागेको प्रदेशसभा बैठकलाई चासोका साथ हेरिएको छ। आज दिउँसो १ बजे प्रदेशसभा बैठक बस्ने छ । दाहाल–नेपाल समूहसँग ३० जना र ओली समूहसँग ७ जना प्रदेशसभा सदस्य रहेका छन। ३७ सदस्यसहित प्रदेशसभामा दुई तिहाइ प्रदेशसभा सांसद रहेको नेकपा विभाजनपछि दुई समूहमा विभाजित भएका छन्।