- २१ भाद्र २०८३, आईतवार / Sep 6, 2026
२२ जेठ २०७७ रुकुम । सोती हत्याकाण्डका आरोपीलाई थप १० दिन हिरासतमा राख्न अदालतले अनुमति दिएको छ । चौरजहारी नगरपालिका– ८, सोतीमा गत १० जेठमा नवराज विक सहित ६ जनाको हत्या प्रकरणका आरोपी १८ जनालाई जिल्ला अदालत रुकुम पश्चिमले बिहीबार १० दिनको म्याद थप गरेको हो ।
जिल्ला प्रहरी कार्यालयले ११ दिनको म्याद माग गरेकोमा अदालतले आरोपीलाई १० दिन हिरासतमा राखेर घटनाको अनुसन्धान गर्न अनुमति दिएको जिल्ला अदालतका श्रेस्तेदार कृतबहादुर बोहराले बताए । मृतकका परिवारले घटनामा संलग्न रहेको भन्दै २० जनाका नाममा किटानी जाहेरी दिएपछि प्रहरीले चौरजहारी– ८ का वडाध्यक्ष डम्बरबहादुर मल्लसहित दुईपटकमा गरी १८ जनालाई पक्राउ गरेको छ ।
दुईजना भने हालसम्म पक्राउ पर्न सकेका छैनन् । पहिलोपटक थप गरिएको १० दिनको म्याद सकिएपछि घटनाको थप अनुसन्धान आवश्यक रहेकाले दोस्रोपटक म्याद थपका लागि अदालतसमक्ष माग गरिएको जिल्ला प्रहरी प्रमुख प्रहरी नायब उपरीक्षक ठगबहादुर केसीले जानकारी दिए ।
प्रेमिकालाई बिहे गरेर लैजान भन्दै आएका जाजरकोटको भेरी नगरपालिका–४ रानागाउँका नवराज विकको समूहलाई सोतीका गाउँलेले लखेटे लखेटी कुटेका थिए । नवराजको सोतीकी कथित उपल्लो जातकी किशोरीसँग प्रेम–सम्बन्ध रहेको र उक्त सम्बन्धलाई विवाहमा परिणत गर्न गएका उनीहरूको हत्या भएको पीडित परिवारले दाबी गरेका छन् ।
