हुम्लामा हिउँ परेपछि जनजीवन प्रभावित

काठमाडौं । यो वर्ष हिमाली जिल्लामा ढिला गरी हिमपात भएको छ । विगत वर्षहरुमा मंसिर अन्तिमदेखि हिउँ पर्ने गरेको भएपनि यो वर्ष हिमाली जिल्ला हुम्लामा बिहीबार रातिदेखि हिउँ पर्न सुरू गरेको हो । सदरमुकाम सिमकोटमा एक फिटसम्म हिउँ जमेको छ । जिल्लाका नाम्खा गाउँपालिकाको वडा नम्बर ६ लिमीमा अझ बढी हिमपात भएको जनाइएको छ ।

लिमी, मुचु, तिला, जाङलगायत गाउँहरु अहिले हिउँले ढाकिएका छन् । जसका कारण एउटा गाँउबाट अर्को गाउँमा पुग्न समेत कठिनाई भएको छ । हिमपात भएपछि हिउँदे बाली सप्रिने हुँदा स्थानीयहरु खुशी भएका छन् । सुदूरपश्चिम र कर्णाली प्रदेशमा हिउँदे वर्षा सुरू भएसँगै हुम्लामा हिउँ परेको हो । जिल्लाको उत्तरी भेगमा भने कात्तिक अन्तिमतिरबाटै हिउँ पर्न थालेको थियो ।