- १३ जेष्ठ २०८३, बुधबार / May 27, 2026
काठमाडौं । अब ५ वटा महानगरपालिकाको अन्तिम मत परिणाम आउन बाँकी रहेका बेला काठमाडौंमा बालेन शाहको अग्रता कायमै रहेको छ । काठमाडौँ, ललितपुर, भरतपुर, पोखरा र वीरगञ्ज महानगरपालिकाको मतगणना जारीरहेको हो ।
जारी मत गणनाअनुसार काठमाडौं महानगरपालिकाको मेयरमा स्वतन्त्र उम्मेदवार बालेन्द्र १८ हजार भन्दा बढी मतले अगाडि छन् । साहले अहिलेसम्म ४२ हजार ८ सय ९३ मत प्राप्त गरेका छन् । नेपाली कांग्रेसकी मेयरकी उम्मेदवार सिर्जना सिंहले २४ हजार ८ सय ५४ मत प्राप्त गर्दा नेकपा एमालेका केशव स्थापितले २३ हजार ९ सय ६८ मत प्राप्त गरेका छन् ।
उता, चितवनको भरतपुर महानगरपालिकाको मेयरमा माओवादी केन्द्रकी उम्मेदवार रेणु दाहालले अग्रता कायम राखेकी छन्। रेणुले ४३ हजार ६१ मत प्राप्त गरेकी छन् । नेकपा एमालेका मेयरका उम्मेदवार विजय सुवेदीले ३३ हजार २ सय ३९ मत प्राप्त गरेका छन् ।
स्वतन्त्र उम्मेदवार जगन्नाथ पौडेलले १३ हजार २ सय ९० मत प्राप्त गरेका छन् । ललितपुर महानगरको मेयरमा कांग्रेसका चिरिबाबु महर्जनले ३० हजार ८ सय ६० मत प्राप्त गर्दा नेकपा एमालेका मेयरका उम्मेदवार हरिकृष्ण व्यञ्जनकारले १८ हजार २ सय १ मत प्राप्त गरेका छन् ।
उपमेयरकी उम्मेदवार मञ्जली शाक्यले १७ हजार ७ सय १६ मत प्राप्त गर्दा माओवादी केन्द्रका बाबुराज बज्राचार्यले १२ हजार ६ सय ६६ मत प्राप्त गरेका छन् । पोखरा महानगरपालिकामा नेकपा एकीकृत समाजवादीका मेयरका उम्मेदवार धनराज आचार्य ४५ हजार २७ मत पाएका छन् ।
नेकपा एमालेका मेयरका उम्मेदवार कृष्णबहादुर थापा ४१ हजार ५ सय ९० मतका साथ दोस्रो स्थानमा छन् । वीरगञ्ज महानगरपालिकामा जनता समाजवादी पार्टीका मेयरका उम्मेदवार राजेशमान सिंहले ३३ हजार ३ सय १५ मत प्राप्त गरेका छन् भने एमालेका मेयरका उम्मेदवार विजयकुमार सरावगीले १७ हजार ४ सय २० मत प्राप्त गरेका छन् । मत गणना जारी छ ।
