- २६ असार २०८३, शुक्रबार / Jul 10, 2026
काठमाडाैं, १५ जेठ । नेपालमा सङ्घीय लोकतान्त्रिक गणतन्त्र स्थापना भएको १७ वर्ष पुगेको छ। २०६५ साल जेठ १५ गते संविधानसभाबाट निरङ्कुश राजतन्त्रको विधिवत् अन्त्य गरी गणतन्त्रको घोषणा गरिएको थियो। नागरिकको त्याग, जनसङ्घर्ष र ऐतिहासिक जनआन्दोलनले ल्याएको यो परिवर्तन अहिले पनि मूल्यांकनको चरणमा छ।
गणतन्त्रले शिक्षा, स्वास्थ्य, सामाजिक सुरक्षा, समान प्रतिनिधित्व र नागरिक अधिकार सुनिश्चित गर्ने आधार तयार गरे पनि बेरोजगारी, महँगी, भ्रष्टाचार र सत्तामोहजस्ता समस्या यथावत् छन्। संविधानविद्हरूले लोकतान्त्रिक गणतन्त्रलाई राष्ट्र निर्माणको बलियो आधार मानेका छन्।
गणतन्त्र दिवसको अवसरमा राष्ट्रभर सार्वजनिक बिदा दिइएको छ भने राष्ट्रपतिदेखि दलका नेतासम्मले नागरिकमा देखिएको निराशा हटाउन संयुक्त प्रयासको आवश्यकता औंल्याएका छन्। गणतन्त्र अब केवल शासन प्रणाली मात्र नभई नागरिकको जीवनशैली बन्नुपर्ने चुनौतीसहित अवसर पनि बोकेको छ।
