- २२ भाद्र २०८३, सोमबार / Sep 7, 2026
मुगु, २५ बैशाख । हिमाली जिल्ला मुगुको मुगुम कार्मारोङ गाउँपालिकामा अनुमति बिना यार्सागुम्बा संकलन गर्न जाँदै गरेका २५ जनालाई प्रहरीले नियन्त्रणमा लिएको छ ।
जिल्ला प्रहरी कार्यालय मुगुका अनुसार विभिन्न यार्सा पाटन क्षेत्रमा प्रवेश गर्न खोजेका जुम्लाको पातारासी गाउँपालिका–१ र २ का एक बालिकासहित २५ जनालाई पक्राउ गरिएको हो । प्रहरी नायव उपरीक्षक रविराज थपलियाले अनुमति बिना वन क्षेत्रमा प्रवेश गर्नेहरूलाई नियन्त्रणमा लिएर अनुसन्धान भइरहेको जानकारी दिए ।
प्रहरीका अनुसार यसअघि पनि अनधिकृत रूपमा यार्सा टिप्न गएकाहरूलाई पक्राउ गरी सम्बन्धित स्थानमा फर्काउने गरिएको थियो । यसपटक भने नियन्त्रणमा लिएकाहरूको बयान लिएर हाजिरी जमानीमा छोडिने बताइएको छ ।
मुगुम कार्मारोङ गाउँपालिकाले हालसम्म यार्सागुम्बा संकलनका लागि आधिकारिक अनुमति खुलाएको छैन । यार्सा संकलनको समय नजिकिँदै गर्दा जिल्लाका विभिन्न पाटन क्षेत्रमा सुरक्षा निगरानी कडा पारिएको प्रहरीले जनाएको छ ।
मुगुका दुई दर्जनभन्दा बढी पाटन क्षेत्रमा पाइने यार्सागुम्बा स्थानीयको मुख्य आम्दानीको स्रोत मानिन्छ । यार्सा संकलनका लागि हुम्ला, जुम्ला, बाजुरा, कालिकोट लगायत जिल्लाका साथै भारतबाट समेत सङ्कलकहरू पुग्ने गर्दछन् ।
