- २५ बैशाख २०८३, शुक्रबार / May 8, 2026
काठमाडौं, २५ बैशाख । सूर्यमुखी तेलमा तोकिएको भन्दा कम परिमाण राखेर बिक्री गरेको आरोपमा एक कम्पनीका सञ्चालक पक्राउ परेका छन् । प्रहरीले छहारी र ओमकार ब्रान्डको सूर्यमुखी तेल उत्पादन गर्ने ओमकार आयल इन्डस्ट्रिज प्रालिका सञ्चालक विजय श्रेष्ठलाई पक्राउ गरेको हो ।
काठमाडौं उपत्यका अपराध अनुसन्धान कार्यालयका प्रवक्ता रामेश्वर कार्कीका अनुसार तेलको प्याकेजिङ गर्दा कम मात्रा राखेर बिक्री वितरण गरिएको आरोपमा श्रेष्ठलाई नियन्त्रणमा लिइएको हो ।
ललितपुरको गोदावरी नगरपालिका–५ लेलेस्थित उद्योगबाट प्रहरीले ९०५ कार्टुन सूर्यमुखी तेलसमेत बरामद गरेको जनाएको छ । प्रहरीका अनुसार उक्त ब्रान्डको तेलमा तोकिएको मापदण्डभन्दा कम तौल राखिएको सूचना पाएपछि अनुसन्धान गरिएको थियो ।
अनुसन्धानका क्रममा मापदण्डभन्दा कम तौल भएको पुष्टि भएपछि थप कारबाहीका लागि जिल्ला प्रहरी परिसर ललितपुर पठाइएको प्रहरीले जनाएको छ ।
