- २६ असार २०८३, शुक्रबार / Jul 10, 2026
काठमाडौँ, ७ जेठ । इरान ले अमेरिकाबाट आफूविरुद्ध कुनै पनि सैन्य आक्रमण भए नयाँ रणनीति र नयाँ हतियारसहित जवाफ दिने चेतावनी दिएको छ। अन्तर्राष्ट्रिय सञ्चारमाध्यमहरूका अनुसार इरानले अन्य देशको प्रभावमा आएर आक्रमण गरिए त्यसको कडा प्रतिकार गरिने जनाएको हो।
इरानी सेनाका प्रवक्ता मोहम्मद अकरमिनिया ले इजरायली प्रभावमा परेर इरानविरुद्ध नयाँ कारबाही गरिए त्यसको जवाफ नयाँ उपकरण र नयाँ तरिकाबाट दिइने बताएका छन्। केही दिनअघि अमेरिकी राष्ट्रपति डोनाल्ड ट्रम्प ले आफू शान्ति सम्झौताको सम्भावना जीवित राख्न चाहेको भन्दै इरानमाथि तत्काल आक्रमण नगर्ने अभिव्यक्ति दिएका थिए। ट्रम्पको उक्त भनाइपछि मध्यपूर्व क्षेत्रमा तनाव कम हुने अपेक्षा गरिएको थियो।
तर इरानको पछिल्लो चेतावनीपछि क्षेत्रीय अवस्था पुनः तनावपूर्ण बन्न सक्ने चिन्ता बढेको छ। इरानी सेनाले आफ्नो वक्तव्यमा सम्भावित सैन्य कारबाहीको जवाफ पहिलेभन्दा अझ व्यापक र फरक शैलीमा दिन सकिने सङ्केत दिएको छ।
यद्यपि, इरानले प्रयोग गरिने भनिएका ‘नयाँ मोर्चा’ वा ‘नयाँ सैन्य रणनीति’ को स्वरूपबारे विस्तृत जानकारी भने सार्वजनिक गरेको छैन।इरानको पछिल्लो अभिव्यक्तिसँगै मध्यपूर्वको सुरक्षा अवस्था र सम्भावित सैन्य सङ्घर्षलाई लिएर अन्तर्राष्ट्रिय चासो पुनः बढेको समाचारमा उल्लेख गरिएको छ।
