- ३१ आश्विन २०८३, शनिबार / Oct 17, 2026
नयाँ दिल्ली । ‘गुगल म्याप’ हेरेर असममा छापा मार्न हिँडेको भारतीय प्रहरी टोली नागाल्याण्ड पुगेको छ । असममा छापा मार्न हिँडेको प्रहरी टोलीले गुगल म्यापमा देखाइए अनुसार बाटो हिँड्दा नागाल्याण्ड पुगेको हो । असम प्रहरीको १६ सदस्यीय टिम एउटा कुख्यात अपराधी लुकेको सूचनापछि छापा मार्न हिँडेको थियो ।
गुगल म्यापमा देखाइएको बाटो ‘फलो’ गर्दै हिँड्दा मंगलबार राति नागाल्याण्डको मोकोकचुङ्ग जिल्लामा प्रहरी टोली पुगेको हो । अधिकांश प्रहरी सामान्य पोसाकमा थिए । उनीहरूसँग अत्याधुनिक हतियारसमेत थियो । मोकोकचुङ्गमा पुगेपछि स्थानीयले सम्भावित खतरालाई मध्यनजर गर्दै प्रहरीको टोलीलाई नियन्त्रणमा लिएर बन्धक बनाएको बताइएको छ ।
एक वरिष्ठ प्रहरी अधिकारीका अनुसार १६ जनाको टोलीमा तीन प्रहरीमात्र बर्दीमा थिए । बाँकीले सामान्य पोसाक लगाएका थिए । स्थानीयवासीले हतियारधारी समूह आएको भन्दै सो टोलीमाथि आक्रमण गरी नियन्त्रणमा लिएको उनको भनाइ छ ।
नागाल्याण्डमा स्थानीयवासीले प्रहरीको टोलीलाई बन्धक बनाएको सूचना पाएपछि असमको जोरहाट प्रहरीले तत्काल मोकोकचुङ्ग प्रहरीका अधिकारीसँग सम्पर्क गरी घटनाबारे जानकारी गराएका थिए । त्यसपछि घटनास्थल पुगेको प्रहरी टोलीले स्थानीयवासीको कब्जामा रहेका प्रहरीलाई उद्धार गरेको थियो ।
