सहकारी ठगी प्रकरणः रवि मुद्वाको आजै आदेश आउन सक्ने

पोखरा । सूर्यदर्शन सहकारी ठगीसमेतका मुद्दामा प्रतिवादीहरुका सम्बन्धमा कास्की जिल्ला अदालतले आज आदेश दिने सम्भावना छ । जिल्ला सरकारी वकिल कार्यालय कास्कीका न्यायाधिवक्ता कमला काफ्ले र उच्च सरकारी वकिल कार्यालय पोखराका सहन्यायाधिवक्ता गोविन्दराज गौलीले जवाफी बहस गरेसँगै अदालतले थुनछेक आदेश दिनेछ । हाल अदालत उपस्थित गराइएका ७ जना प्रतिवादीहरुको तर्फबाट वकिलहरुको बहस बुधबार नै सकिएको छ ।

बुधबार नै जाहेरवालाका तर्फबाट पनि जवाफी बहस भइसकेको छ भने अब सरकारी वकिल कार्यालयका तर्फबाट जवाफी बहस मात्र हुन बाँकी छ । प्रतिवादीका तर्फबाट कानुन व्यवसायीको बहस सकिएसँगै जाहेरवाला तथा सरकारी वकिलका तर्फबाट जवाफी बहस गर्ने व्यवस्था छ ।

अब बहस आखिरीमा पुग्दा पूर्व गृहमन्त्री एवं रास्वपा सभापति रवि लामिछाने, पूर्व डीआईजी छविलाल जोशी, पूर्व सांसद मीना गुरुङसमेतका प्रतिवादीलाई पुर्पक्षका लागि थुनामा पठाउने कि धरौटी वा तारेखमै रिहा गर्ने भन्ने आदेशबारे सबैको चासोको विषय छ । कास्की जिल्ला अदालतका स्रेस्तेदार राजन खनालले राजधानीसँग भने, ‘आज सरकारी वकिलको तर्फबाट जवाफी बहस हुने र आज नै न्यायाधीश नीतिज राईको इजलासबाट थुनछेक आदेश आउन सक्ने बताए ।