- ३० असार २०८३, मंगलवार / Jul 14, 2026
काठमाडौं । पश्चिम नवलपरासीमा नियमविपरीत सञ्चालन भएका औषधी पसललाई प्रशासनले कारबाही गर्न थालेको छ। औषधी पसल दर्ताविनै सञ्चालन भएको गुनासो बढेपछि स्वास्थ्य कार्यालय, स्थानीय तह, जिल्ला प्रशासन, करदाता सेवा कार्यालयसहितको संयुक्त टोलीले अनुगमन गर्न थालेको हो।
अनुगमनका क्रममा सदरमुकामका दुई औषधी पसललाई जरिवाना गरिएको हो। जिल्लामा ६० भन्दा बढी औषधी पसल विनादर्ता सञ्चालनमा रहेको बताइएको छ। दर्ता भएर सञ्चालन भएका आधिकांश पसलले पनि अनुमति लिएको भन्दा फरक कारोबार गर्ने गरेका पाइएको अनुगमन टोलीले जनाएको छ।
अनुगमनमा क्रममा बुद्धचोकमा सञ्चालनमा रहेको समिता मेडिकल र सन मेडिकल हल नियमविपरीत सञ्चालन भएको पाइएको स्वास्थ्य कार्यालयका प्रमुख ओमप्रकाश पन्थीले जानकारी बताए। फार्मेसी सञ्चालक उपस्थित नभई औषधी बिक्री गर्ने गरेको र बिलबिजक नराखेको समिता मेडिकललाई १० हजार रुपैयाँ जरिवाना गरिएको छ।
त्यस्तै पसलमा फार्मेसीसँग सम्बन्धित व्यक्ति रहे पनि एक वर्षदेखि विदेशमा रहेका व्यक्तिको फार्मेसी सञ्चालन अनुमतिपत्र राखेर औषधी बिक्री गर्नुका साथै पान नम्बर नराखी पसल सञ्चालन गरेको भन्दै सन मेडिकल हललाई दुई हजार रुपैयाँ जरिवाना गरिएको छ। यसअघि दर्ताबिना सञ्चालन गरिएको उक्त पसललाई अनुगमन टोलीले सिल गरेको थियो।
जिल्ला औषधी व्यवसायी संघका अनुसार जिल्लामा २१० औषधी पसल रहेकामा ६० विनादर्ता सञ्चालनमा रहेको जानकारी आएकाले क्रमशः अनुगमन गरेर कानूनी दायरामा ल्याइने स्वास्थ्य कार्यालयले जनाएको छ। जिल्लामा १५० औषधी पसल औषधी विभागमा दर्ता भएर सञ्चालनमा छन्। रासस
