- ३१ आश्विन २०८३, शनिबार / Oct 17, 2026
काठमाडौं। बाँसबारी छाला जुत्ता कारखानाको जग्गा हिनामिना आरोपमा पक्राउ परेका व्यवसायी अरुण चौधरीसँग बयान लिन थालिएको छ । सरकारी वकिल कार्यालयका प्रमुख सन्देश श्रेष्ठको अगुवाइमा अनुसन्धान अधिकृतहरूले बयान गहिरिएर लिएको बुझिएको छ ।
नेपाल प्रहरीको केन्द्रीय अनुसन्धान ब्युरो (सिआइबी) प्रवक्ता प्रहरी उपरीक्षक नवराज अधिकारीले कानुनी प्रक्रियाअन्तरगत नै बयान लिन थालिएको जानकारी दिए । उनले चार दिन म्याद थप भएकाले त्यही म्याद भित्र रहेर अनुसन्धान भइरहेको बताए ।
बयानका क्रममा चौधरीले आफू जग्गा फिर्ता गर्न तयार रहेको बताएको एक अनुसन्धान अधिकृतले बताए । सिआइबीले तीन महिनाको अनुसन्धान पछि बाँसबारी छाला जुत्ता कारखानाको जग्गा प्रकरणमा चौधरीलगायत तीन जनालाई माघ १८ गते पक्राउ गरी अदालतबाट म्याद थपेर अनुसन्धान गरिरहेको छ ।
अनुसन्धान अधिकृतले क्रमैसँग बयान लिने छन् । प्रहरीले अनुसन्धान नगरिकन व्यावसायिक घरानालाई पक्राउ गरियो भन्ने कुराहरू आएकोले लामो समयको अनुसन्धान पछि नै पक्राउ गरिएको सिआइबीका प्रहरी वरिष्ठ उपरीक्षक दिनेशराज आचार्यले बताए ।
