- १६ जेष्ठ २०८३, शनिबार / May 30, 2026
एजेन्सी । मध्यपूर्वी एसिया खतरनाक युद्धतर्फ धकेलेको छ। गोलान हाइट्समा १२ बालबालिकाको ज्यान जाने गरी भएको आक्रमणले युद्धतर्फ धकेलेको हो ।
अमेरिका भ्रमणमा रहेका इजरायली प्रधानमन्त्री बेन्जामिन नेतन्याहू तत्काल भ्रमण छोट्याएर इजरायल फर्किएका छन्। उनले हेजबुल्लाहसँग बदला लिने चेतावनी दिएका छन्।
शनिबार गोलान हाइट्समा फुटबल खेलिरहेका बालबालिकामाथि भएको रकेट आक्रमणमा लेबनानको हेजबुल्लाह समूहको संलग्नता रहेको आरोप इजरायलले लगाएको छ।
योसँगै मध्यपूर्वका अरु देशसमेत सशंकित भएका छन्। टर्कीले इजरायलले लेबनानमा आक्रमण गरे आफ्नो सेना नरोकिने चेतावनी दिएको छ। टर्कीका राष्ट्रपति रिसेप तायिप एर्दोगानले एक टेलिभिजन सम्बोधनमा विगतमा आफ्नो सेनाले लिबियामा समेत हस्तक्षेप गरेको स्मरण गर्दै इजरायलविरुद्ध पनि जाने चेतावनी दिए।
इजरायलको वार क्याबिनेट बैठकले हेजबुल्लाह समूहलाई जवाफ दिने निर्णय गरिसकेको छ। गाजामा आक्रमण सुरु भएदेखि नै हेजबुल्लाह र इजरायलबीच विवाद बढ्दै गएकोमा यसपटकको घटनाले युद्धलाई थप अनुमोदन गरिदिएको बीबीसीले उल्लेख गरेको छ।
इजरायली विदेशमन्त्री इजरायल काट्जले एर्दोगान सद्धाम हुसेनको बाटोमा हिँड्न लागेको भन्दै सद्धाम हुसेनको अवस्था के भयो भन्ने थाहा पाउन चेतावनी दिए।
