- २२ असार २०८३, सोमबार / Jul 6, 2026
काठमाडौँ । प्रमुख प्रशासकीय अधिकृतप्रति क्रुद्ध बनेका मेयर बालेन्द्र साह (बालेन)ले कार्यपालिकाका निर्णय प्रमाणीकरणमा ‘किर्ते’ गरेको भन्दै मेयर गृहमन्त्री नारायण काजी श्रेष्ठलाई फोन गरेर तत्काल थुनामा राख्न कारबाहीको माग गरेका छन् ।
मेयर बालेनको तारनतारको फोनपछि गृहमन्त्री श्रेष्ठले यसबारे मन्त्रालयमा छलफल गरेका छन् । पक्राउ पुर्जी नलिई पक्राउ गर्न नपाइने व्यवस्था बारे मन्त्रीले कर्मचारीले सुझाएको बुझिएको छ ।
प्रक्रियागत रूपमा कर्मचारीले बदमासी नै गरेको हो भने स्थानीय तहले अख्तियार दुरुपयोग अनुसन्धान आयोगलाई पत्र पठाउन सक्ने र आयोगले छानबिन गरी मुद्धा दायर गर्न सक्ने विषयमा कर्मचारीले मन्त्रीलाई जानकारी गराएको स्रोतको दावी छ ।
पुलिसले अनुसन्धान गरेर मुद्धा दायर गर्ने भए पनि कर्मचारी हकमा भने अख्तियारमार्फत नै जाने विषय जानकारी गराइएको हो । कानुनी प्रक्रिया शुरु गर्दै गर्दा त्यसका जति पनि प्रावधानहरू हुन्छन् त्यो विषयका बारेमा कुरा हुनु स्वभाविक भएको मेयर साहका स्वकीय सचिव भूपदेव साहले बताए ।
आन्तरिक रूपमा लिखित तथा मौखिक रूपमा सचेत गराउने गरिँदै आएकोले अहिलेको विषयलाई पनि सुशासन कायम गराउने कार्यकै निरन्तरता भएको उनको भनाई छ ।
