- १ भाद्र २०८३, सोमबार / Aug 17, 2026
सुनसरी । कोशी ब्यारेजका सबै ५६ वटै ढोका खोलिएको छ। दुई दिनदेखिको अबिरल वर्षाका कारण सप्तकोशी नदीमा पानीको बहाव बढेपछि सबै ढोका खोलिएको हो ।
आइतबार बिहान ६ बजे पानीको बहाव तीन लाख ४२ हजार क्युसेक रहेको र पानीको बहाप बढेसँगै निरन्तर अनुगमन गरिरहेको जिल्ला प्रशासन कार्यालय सुनसरीले जनाएको छ ।
प्रतिसेकेन्ड नौ लाख क्युसेक पानी बहने क्षमता रहेको ब्यारेजमा अहिले ३ लाख ६८ हजार क्युसेक पानी बगिरहेको छ । यसअघि २०७६ असार २९ गते पनि ब्यारेजका सबै ढोका खोलिएको थियो।
पानीको बहाब अहिले पनि निरन्तर बढिरहेकोले जल तथा मौसम विज्ञान विभाग अन्तर्गत बाढी सूचना केन्द्रले पनि सप्तकोशीमा पानीको बहाव बढ्दो क्रममा रहेकाले नदी तटीय क्षेत्रमा सतर्क रहन सुसूचित गरेको छ।
पानीको बहाव अत्याधिक बढेकाले आइतबार बिहान ९ बजेदेखि सबै ढोका खोलिएको जिल्ला प्रहरी कार्यालय सुनसरीले जनाएको छ । आफूहरुको पूरै ध्यान अहिले बाढी पहिरोमा केन्द्रित रहेकाले भारतीय पक्षसँग पनि समन्वय गरिरहेको जिल्ला प्रशासन कार्यालयले जनाएको छ ।
