भक्तपुरमा बिस्का जात्राको तयारी तीव्र, भैरवनाथको रथ निर्माण हुँदै

मुख्य बुँदा 

 भक्तपुरमा बिस्का जात्राको तयारी तीव्र

टौमढीमा भैरवनाथको रथ निर्माण अन्तिम चरणमा

करिब ३० फिट अग्लो तीनतले रथ तयार हुँदै

नयाँ वर्षअघि रथ तानेर जात्रा सुरु हुने परम्परा

हजारौँ युवाले डोरी तानेर रथ सञ्चालन गर्ने चलन

भक्तपुर, १८ चैत । भक्तपुरको ऐतिहासिक तथा सांस्कृतिक पर्व बिस्का जात्राको तयारी तीव्र रूपमा अघि बढिरहेको छ। भक्तपुर नगरपालिका–५ टौमढीस्थित पाँचतले मन्दिरअगाडि भैरवनाथको रथ निर्माण कार्य भइरहेको छ।

आठ रात नौ दिनसम्म चल्ने बिस्का जात्रा सुरु हुन केही दिन मात्रै बाँकी रहँदा रथ निर्माण तीव्र रूपमा अघि बढाइएकाे छ । परम्पराअनुसार नयाँ वर्ष आगमनको चार दिनअघि पाँचतले मन्दिरअगाडि प्यागोडा शैलीमा काठबाट बनाइएको करिब ३० फिट अग्लो तीनतले भैरवनाथको रथ तान्दै जात्रा प्रारम्भ गरिन्छ।

रथ तान्ने क्रममा दुवैतर्फबाट मोटामोटा डोरी प्रयोग गरिन्छ। एकातिर ६ वटा र अर्कोतिर ४ वटा डोरी राखेर हजारौँ युवाहरूले रथ तान्ने प्रचलन रहिआएको छ।

यस जात्रालाई भक्तपुरको पहिचानका रूपमा लिइन्छ, जसमा स्थानीयवासीको उत्साह र सहभागिता उल्लेखनीय रहने गर्दछ। याे जात्रालाइ विश्वपहिचान बाेकेकाे जात्राकाे रूपमा हेरिन्छ ।