- २६ असार २०८३, शुक्रबार / Jul 10, 2026
काठमाण्डौ । सुरक्षण मुद्रण केन्द्रका तत्कालीन कार्यकारी निर्देशक विकल पौडेललाई उपकरण खरिदमा भ्रष्टाचार गरेको कसुरमा विशेष अदालतले दोषी ठहर गरेको छ।
अदालतका अध्यक्ष टेकनारायण कुँवर तथा सदस्यहरू तेजनारायण सिंह राई र रामबहादुर थापाको इजलासले पौडेललाई एक वर्ष ६ महिना कैद र १३ करोड ५८ लाख ५२ हजार ५८० रुपैयाँ बिगो बराबरको जरिवाना सुनाएको हो। कार्यकारी निर्देशकको भूमिकामा रहेकाले थप ६ महिना कैद सजाय समेत थपिएको छ।
साथै, उपकरण खरिदको ठेक्का लिएको म्याक्स इन्टरनेशनल प्रालि र उक्त कम्पनीका सीईओ अकबर हुसेनलाई पनि अदालतले दोषी ठहर गरेको छ। अकबर हुसेनलाई डेढ वर्ष कैदसहित बिगो बराबरको १३ करोड ५८ लाख ५२ हजार ६८० रुपैयाँ जरिवाना गरिएको छ। साथै, दोषीहरूसँग बिगो रकम असुल गर्न आदेश दिइएको छ।
अपराध पीडित संरक्षण ऐन २०७५ को दफा ४१ (३) अनुसार, विकल पौडेल, म्याक्स इन्टरनेशनल प्रालि र अकबर हुसेनले जनही ५४ लाख ३४ हजार १०३ रुपैयाँ पीडित राहत कोषमा क्षतिपूर्ति स्वरूप जम्मा गर्नु पर्ने समेत अदालतको फैसलामा उल्लेख छ। यसै मुद्दामा संलग्न अन्य प्रतिवादीहरू–सफल श्रेष्ठ, नवीनकुमार पोखरेल, हरिवल्लभ घिमिरे र खड्कबहादुर थापा भने सफाइ पाउन सफल भएका छन्।
