- ९ जेष्ठ २०८३, शनिबार / May 23, 2026
काठमाडौं । सवारीसाधन जाँचपास नभएर वीरगञ्ज भन्सार कार्यालय भन्सार ‘यार्ड’ मा एक हजार दुई सयबढी गाडीहरु थन्किएका छन् । शोरुममा भएका सवारीसाधन बिक्री भएपछि मात्रै भन्सार यार्डमा रोकिएका सवारीसाधनको जाँचपास गराउने अटोमोबिल व्यवसायीले बताएका छन् ।
कार्यालयमा मात्रै जाँपपास नभएका एक हजार दुई सयबढी इन्धनबाट चल्ने सवारीसाधन रहेको भन्सार कार्यालय प्रमुख भन्सार प्रशासक डिलाराम पन्थीले बताए । कार्यालयका अनुसार भन्सार यार्डमा बस, ट्रक तथा च्यासिस र बडीलगायत छन् । २०७९ चैतमा भन्सारमा जाँचपास नभएका सवारीसाधनको सङ्ख्या दुई हजार दुई सयभन्दा बढी थियो । त्यसैगरी २०८० को साउनमा भन्सारमा थन्किएका सवारीसाधनको सङ्ख्या घटेर एक हजार आठ सयमा झरेको थियो ।
२०८० चैत १५ गतेसम्म भन्सारमा थन्किएका सवारीसाधनको सङ्ख्या बढेर एक हजार दुई सय पुगेको छ । आर्थिक मन्दीले दुई वर्षअघिदेखि नै सवारीसाधन भन्सारमा जाँचपास नभई थन्किरहेको अटोमोबिल्स एशोसिएसन अफ नेपालका पूर्वअध्यक्ष ध्रुव थापाले बताए । भन्सारमा रोकिएका इन्धनबाट चल्ने सवारीसाधन खरिद मूल्यभन्दा धेरै रकम भन्सार महसुल तथा राजस्वबापत तिर्नुपर्ने भएकाले विस्तारै छुटाउने नीति लिँदै आएको उनको भनाइ छ ।
भन्सार यार्डमा रोकिएका एक हजार दुई सय सवारीसाधनको जाँचपास हुने हो भने रु १० अर्ब राजस्व संकलन हुने देखिन्छ । रोकिएका सवारीसाधनमध्ये अधिकांश व्यावसायिक प्रयोजनका लागि ल्याइएका गाडीहरु छन् । अहिले विद्युतीय सवारीसाधनमा बैंक तथा वित्तीय संस्थाले ७० प्रतिशतसम्म फाइनान्सिङ गर्दै आइरहेका छन् ।
