- ३ बैशाख २०८३, बिहीबार / Apr 16, 2026
भक्तपुर । बागमती प्रदेश अन्तर्गतका जनस्वास्थ्य कार्यालयमध्ये ललितपुर प्रथम भएको छ । कार्यसम्पादन प्रगती समीक्षा गर्दा ललितपुर प्रथम भएको हो । गत आर्थिक वर्षको प्रगती समीक्षा गर्दा १३ वटै जिल्ला जनस्वास्थ्य कार्यालयलाई उछिन्दै जनस्वास्थ्य कार्यालय ललितपुर ७५ अंकसहित प्रथम भएको हो । छिमेकी जिल्ला ललितपुर प्रथम हुँदा भक्तपुरले भने सातौँ स्थानमा चित्त बुझाएको छ ।
मन्त्री किरण थापाको गृह जिल्ला रहेको भक्तपुरको स्वास्थ्य कार्यालयले ६७.१९ अंक प्राप्त गरेको बागमती प्रदेश स्वास्थ्य निर्देशनालयले जनाएको छ । समीक्षा गोष्ठीको अन्तिम दिन बुधबार बागमती प्रदेशका स्वास्थ्यमन्त्री किरण थापामगरले जनस्वास्थ्य कार्यालय ललितपुरका प्रमुख डा.भुवन पौडेललाई प्रशंशा पत्र प्रदान गरे ।
आगामी वर्षको कार्यसम्पादन मूल्यांकनमा भक्तपुर पहिलो बनाउने गरी मेहनत गर्न सम्बन्धित सरोकारवालाई मन्त्रीले घचघच्याएको स्वास्थ्य मन्त्री थापाको सचिवालयले जनाएको छ। यसका लागि आवश्यक निर्देशन गरिसकेको सचिवालयको दावी छ ।
सोमबारदेखि समीक्षा गोष्ठी गरेको बागमती प्रदेश स्वास्थ्य निर्देशनालयले सो समीक्षामा बिभिन्न सूचक प्राप्त प्राप्ताङ्कका आधारमा जनस्वास्थ्य कार्यालय ललितपुर प्रथम, चितवन दोश्रो र मकवानपुर तेस्रो भएको जनाएको छ । त्यसैगरी काभ्रेपलाञ्चोक चौथो काठमाडौं पाचौं र धादिङ छैटौं भएका छन् ।
सबैभन्दा कमजोर कार्यसम्पादन गर्ने जिल्लामा रसुवा परेको छ । रसुवाले ६० अंक हासिल गरेको छ । समीक्षाबाट जनस्वास्थ्य कार्यालयको वास्तविक अवस्था पहिचान भएको स्वास्थ्य मन्त्री किरण थापाले बताएका छन् । अव सबै जनस्वास्थ्य कार्यालयले सुधारका कार्य अघि बढाउँन आवश्यक निर्देशन समेत दिएका छन् ।
