- २ आश्विन २०८३, शुक्रबार / Sep 18, 2026
काठमाडौं । नारायणगढ–मुग्लिन सडकखण्डको सिमलतालमा शुक्रबार भएको बस दुर्घटनामा रौतहटको बौधिमाई नगरपालिका वडा नं ३ मटिअर्वाका एकै परिवारका चार जना बेपत्ता भएका छन् ।
त्यस्तै गरुडा नगरपालिका ९ सिसवाका पनि एकै परिवारका ४ जना बेपत्ता भएका छन् । बौधिमाई नगरपालिका, मटिअर्वाका ५८ वर्षका परशुराम साह श्रीमती मीना देवी, माइलो छोरा सरोज, छोरी रिंकु र ज्वाई नरेश साहलाई लिएर २६ असारमा काठमाडौं गएका थिए । कान्छो छोरा कृष्णनन्दन साह नेपाली सेनाको ९ महिने तालिम पश्चातको पासआउट समारोहमा सहभागी हुन परशुराम परिवारजनका साथ काठमाडौं गएका थिए ।
गाउँबाट नै काठमाडौं जाने गणपति डिलक्स बसमा गएका साह २७ गते सोही बसबाट फर्किदै थिए ।
परिवारका ५ जनामध्ये सरोज साह भने दुर्घटनामा जोगिएका छन् ।
शुक्रबार बिहान मुग्लिन नारायणगढ सडक खण्डको सिमलतालमा माथिबाट खसेको पहिरोले बगाउँदा दुईवटा बस त्रिशूलीमा खसेर बेपत्ता भएका छन् । त्यहाँ कम्तीमा ५० यात्रु रहेको अनुमान छ ।
