जलनका बिरामीलाई सात अस्पतालमा निःशुल्क उपचार (सूचीसहित)

काठमाडौं । सरकारले सात वटा अस्पतालमा जलनका बिरामीको निःशुल्क उपचार गर्ने निर्णय गरेको छ । स्वास्थ्य तथा जनसंख्या मन्त्री प्रदीप पौडेलको प्रस्ताव मन्त्रिपरिषदबाट पारित भएसँगै देशका सात वटा अस्पतालबाट उपचार खर्च व्यहोर्न नसक्ने नागरिकले सघन जलनको उपचार निःशुल्क हुने भएको हो । शुक्रबारको मन्त्रिपरिषद बैठकले स्वास्थ्य मन्त्री पौडेलको प्रस्ताव पारित गरेको हो।अब सात वटै प्रदेशका एक, एक अस्पतालमा जलनको निशुल्क उपचार सेवा सुरु हुने छ ।

सेवा प्रदान गर्ने अस्पतालहरु
कोशी प्रदेशः बीपी कोइराला स्वास्थ्य विज्ञान प्रतिष्ठान
मधेश प्रदेशः नारायणी अस्पताल
बागमती प्रदेशः कीर्तिपुर अस्पताल
गण्डकी प्रदेशः पोखरा स्वास्थ्य विज्ञान प्रतिष्ठान अस्पताल
लुम्बिनी प्रदेशः भेरी अस्पताल
कर्णाली प्रदेशः सुर्खेत प्रादेशिक अस्पताल र
सुदूरपश्चिम प्रदेशः सेती प्रादेशिक अस्पतालमा निःशुल्क उपचार सेवा पाउने छन् ।यसको उपचारका लागि स्वास्थ्य मन्त्रालय र अन्तर्गतका निकायहरुमा ८ करोड रुपैयाँ बिनियोजन भएको छ। कीर्तिपुर अस्पताललाई दुई करोड र अन्य अस्पताललाई एक एक करोड रुपैयाँ उपलब्ध गराएको छ। हरेक वर्ष ५५ हजार जनामा आगलागी वा कुनै माध्यमबाट जलनको समस्या देखिने गरेको स्वास्थ्य मन्त्रालयको प्रक्षेपण छ ।