तराईमा अझै केही दिन अत्यधिक गर्मीको सम्भावना,सतर्कता अपनाउन आग्रह

काठमाडौं । तराईका मध्य तथा पश्चिमी भूभागमा अझै केही दिन अत्यधिक गर्मीको सम्भावना छ । सुदूरपश्चिम र लुम्बिनी प्रदेशका तराई भूभागका कतिपय स्थानमा केही दिनयता अधिकतम तापक्रम ४० डिग्री सेल्सियस वा त्योभन्दा बढी मापन गरिएको मौसम पूर्वानुमान महाशाखाले जनाएको छ ।

महाशाखाका अनुसार, तराईका मध्य तथा पश्चिमी भूभागमा अबका तीन दिन तातो हावाको सम्भावना छ । त्यसको असरबाट जोगिन आवश्यक सतर्कता अपनाउन महाशाखाले सुझाव दिएको छ ।

महाशाखाले मंगलबार तातो दिन तथा तातो लहरसम्बन्धी विशेष बुलेटिन जारी गर्दै सतर्कता अपनाउन आग्रह गरेको हो । महाशाखाले यो वर्ष तातो दिन तथा तातो लहरसम्बन्धी मंगलबार नवौँ विशेष बुलेटिन जारी गरेको हो ।