- ९ जेष्ठ २०८३, शनिबार / May 23, 2026
पोखरा । मध्यपहाडी लोकमार्गको संकल्प यात्रामा निस्किएका एमाले अध्यक्ष केपी शर्मा ओलीले चमेरे गुफा वरपरका बासिन्दाको गुनासो नसुनेरै दौडिएका छन् ।
बिहीबार पोखरा महानगरपालिका–२५ मिलनचोकमा नेता कार्यकर्ताले स्वागत गरेपछि मिलन चोकमा उभिएर ओलीले हेम्जाको जस्तो भाइरल तथा सेल्फी सडक एमालेकै नेतृत्वमा देशभर बएको गफ सुनाए ।
पोखरा–१६ चमेरे गुफा वरपरका बासिन्दाले ओलीलाई स्वागत गर्ने, आफ्ना हैरानी सुनाउने चाहना राखेका थिए । उनीहरु मध्यपहाडी लोकमार्गको अर्मलाकोट, कालीखोला पुल, महेन्द्रगुफा, चमेरे गुफा, अमला बिसौनी, लामाचौर, जौबारी हुँदै यम्दी पुलसम्मको रेखांकनप्रति सन्तुष्ट छैनन् ।
झण्डै दुई वर्षदेखि आन्दोलन गरिरहेका करिब ५०० घर परिवार ओलीलाई भेटेर आफ्नो असन्तुष्टि सुनाउन खोजेका थिए । २०७७ फागुनमा ओली नेतृत्वकै मन्त्रिपरिषद्ले भैंसे, ज्याम्दु, मेलबोट, पानीघाट, आँटीघर, अर्मलाकोट, कालीखोला पुल, अमला बिसौनी, लामाचौर, जौबारी हुँदै याम्दी पुलसम्मको बाटोको रेखांकन पारित गरेको थियो ।
३५ दशमलव ५ किलोमिटर खण्ड निर्माणको ठेक्का स्वच्छन्द एपेक्स जेभीले ३ अर्ब ४२ करोड रुपैयाँमा ३ वर्ष २०८२ भित्र काम सक्ने गरी पाएको छ ।
तर पूर्वप्रधानमन्त्री ओली मध्यपहाडी लोकमार्ग यात्राका क्रममा विवादित क्षेत्र छलेर पोखराको सहर–सहरबाट रुपा गाउँपालिका हुँदै लमजुङ छिरेपछि त्यहाका स्थनीयले रुष्ट भएका छन् ।
